Langsiktig tenkning, steg for steg.

Sommarbrev til alle gjevarar, sommaren 2008.

Me byrjar no på vårt fjerde år på Toro Babies Home. I 2005, då Gerda overtok barneheimen, var det 17 barn som budde på heimen. No er det 45, og det er stadig pågang frå politi eller pårørande i ein vanskeleg situasjon, med born som treng hjelp..

Når dette brevet vert sendt ut, er Gerda i Fort Portal, der ho skal vera frå april til juli. Denne gangen reiser ho åleine. Målet med turen er å følgje opp prosjektet og å halde kontakt med alle gode hjelparar i Uganda. Ei anna prioritert oppgåve no er å leggje til rette for utbygging av permanente heimar, og å etablere gode rutinar for drift av farmen Kagote.

Dei siste månadane har vore påverka av uro i nabolandet Kenya, noko som har skapt vanskar for transportruter i regionen. Det har også vore utbrot av ebola-virus i området, noko som har prega livssituasjonen, også for born og tilsette ved barneheimen. Det er ustabile strømforsyningar i landet, og me tenker på løysingar med alternative energikjelder for barneheimen, som aggregat og solcellepanel.

Farmen er eit satsingsområde for oss, fordi den er eit viktig bidrag til godt kosthald for borna på barneheimen, og også fordi eigenproduserte råvarer reduserer utgiftene til mat i budsjettet.

Skulelunchen held fram med like mange born som før. Nokre born har gått over til andre skular på grunn av alder, og andre overtek plassen deira.

Dette året har me ikkje hatt bøsseaksjon. Store og små gåver frå faste og tilfeldige gjevarar har så langt sikra drift av barneheimen og skulelunchen. Me er særleg glad for at born hjelper born; skular og barnehager på Stord og Bømlo har engasjert seg.

Livet kan vera hardt i Uganda. Eit av barna på barneheimen døydde i vinter på grunn av hiv/aids. Svært mange born og vaksne i Uganda er ramma av denne sjukdommen, og det vil til ei kvar tid vera nokre av barna på barneheimen som og er det. Dette er ein av grunnane til at me ikkje har satsa på ei ordning med fjernadoptering av eit enkelt barn for gjevarane.

Me vil igjen nytta høvet til å takka for alle gåver, all støtte, velvilje og engasjement som prosjektet møter! Det gjev inspirasjon og pågangsmot!

Varm helsing frå Uganda!

Med venleg helsing styret TCCC.

Bli gjevar i dag. Ta kontakt med TCCC over e-mail eller telefon. Vårt kontonummer er 3520.57.62742.